ទស្សនៈឡប់ៗ ៖ សម្រែកក្បែររេញ
January 17, 2009 by coolloveរយៈពេលជាច្រើនសប្ដាហ៍មកហើយដែលខ្ញុំមិនបាន Update ប្លក់ខ្ញុំទាល់តែសោះ ដោយសារមានការមមាញឹកមួយចំនួន។ ព្រឹកនេះ នៅពេលអានកាសែតដូចសព្វមួយដង ស្រាប់តែបានប្រទះអត្ថបទមួយធ្វើឲ្យខ្ញុំគិត រួមទាំងផ្ទុះសំណើចម្នាក់ឯងដោយមិនដឹងខ្លួន។ នេះដោយសារអ្នកសរសេររៀបរាប់ចំៗពេកសម្រាប់បរិបថសង្គមសព្វថ្ងៃ។ បើមិនចែកជូនប្រិយមិត្តអ្នកអានទេ ហាក់ដូចជានៅមិនស្ងប់សោះ។ ដូច្នេះ ខ្ញុំសូមដកស្រង់នូវអត្ថបទទាំងស្រុងដូចខាងក្រោម គ្រាន់ជាការគិតពិចារណា និងកែការធុញទ្រាន់ខ្លះ។
ទស្សនៈឡប់ៗ ៖ សម្រែកក្បែររេញ
អាក្រហមឬខៀវអ្ហែងវ៉ៃវាឲ្យសន្លប់ ចុះម៉ោវិញអញឲ្យ ១០.០០០រៀល។ បើវ៉ៃវាមិនសន្លប់ទេ អ្ហែងវ៉ៃវាឲ្យបែកឈាមក៏អញឲ្យអ្ហែង ៥.០០០រៀលដែរ។
ឯពេទ្យដែលមានតុនៅជាប់នឹងរេញត្រៀមចេសចាំតែដេរប៉ុណ្ណោះ។ អ្នករបួសនឹងមាន១ថ្នេរ ៥.០០០រៀល។ ឯពិធីករវិញ ពាក់អាវធំចងក្រវាត់ក ស្រែកឡូឡាមុខមេក្រូថា បង្គោលខៀវប្រើស្នៀតហនុមានច្រានភ្នំ ឯខាងក្រហមស្នៀតឥសីបោសលាន ឯអាប៊ីតក៏មិនអន់ដែរ ប្រើសុទ្ធតែស្នៀតហនុមានតស្ពានទៅយកនាងសិតា។
ឯតាៗដែលជាគ្រូគុន អាយុជាងកន្លះសតវត្សរ៍ទៅហើយនោះ អង្គុយចំហមាត់សួរគេសួរឯងថា អ្ហីក្បាច់គុនខ្មែរឥឡូវគេ Update ឈ្មោះពីរោះណាស់ហ្ន៎? នាយរ៉ូហ្សាខ្មុំនៅក្បែរនោះក៏លោតែជោរឡើងចង់បង្កើតស្នៀតមួយនឹងគេដែរ ដោយឲ្យឈ្មោះថា កងវិស្វកម្មតស្ពានព្រមានស្ទឹងសង្កែ។
នាយចយ នៅក្បែរនោះ លស់ព្រលឹងស្រែកឃាត់ថា កុំអី ព្រោះក្បែរៗស្ទឹងសង្កែសម្បូរគ្រូគុនល្បីៗណាស់។ ទុកមុខទុកមាត់ឲ្យនាយចយ ខ្ញុំក៏នៅស្ងៀម ស្ដាប់ពិធីករពុលទឹកមាត់តទៅទៀត។
ពិធីករមួយនោះ គាត់ពូកែប្រឌិតក្បាច់គុនណាស់ ហើយប្រូទាំងខុសទៀតផង។ គាត់និយាយថា អ្នកវ៉ៃឈ្នះបានលេខ១ បាន២លានរៀល លេខ២បាន១លានរៀល…។
ឮសូររង្វាន់ច្រើនលានរៀល ខ្ញុំក៏ទាញក្បាច់ចិនមកគិតគូរមើលឃើញថា តម្លៃខ្លួនជាលានរៀលនោះ តែប៉ុន្មានរយដុល្លាប៉ុណ្ណោះ។
ដល់អីចឹង ស្រណោះទៅដល់សត្វមាន់នៅក្នុងព្រឹត្តិការណ៍ប្រកួតមួយ បើមាន់ណាដណ្ដើមបានលេខ១នោះនឹងបានរង្វាន់ ៥.០០០ដុល្លារអ៊ុយអេសឯណោះ។ លេខ២ បាន៣ពាន់អ៊ុយអេស ហើយសត្វមាន់ទាំងនោះត្រូវគេថ្នមដូចកូនក្រមុំ មិនតែប៉ុណ្ណោះជិះសុទ្ធតែឡានទំនើបៗទៀតផង។
ដំបូងៗ ឮសូររង្វាន់រាប់លានដូចជាចង់ធ្វើអ្នកវ៉ៃបុកដែរ តែដល់គណនាទៅមិនបានមួយចំណិតរង្វាន់មាន់ផងនោះ នាយរ៉ូហ្សាខ្ញុំមានតែដកទៅវិញ។
ណ្ហើយខ្ជិល ចេះតែអង្គុយស្ដាប់សម្រែកចម្រុះគ្នាដូចសម្លចាប់ឆាយរដូវចូលឆ្នាំចិនក្បែររេញទៀតទៅ ក្រែងលោចេះស្នៀតថ្មីៗទៀត ពិសេសស្នៀតស្ដេចតោកោរពុកមាត់៕ នាយរ៉ូហ្សា
ដកស្រង់ចេញពី កាសែតរស្មីកម្ពុជា ឆ្នាំទី ១៧ លេខ ៤៧៩៧ ថ្ងៃសៅរ៍ ទី១៧ ខែមករា ឆ្នាំ ២០០៩ ទំព័រ ក២
ជ្រុងមួយនៃក្រុងព្រះសីហនុ
August 30, 2008 by coollove
ទន្ទឹមនឹងសោភ័ណ្ឌភាពស្រស់ឆើតឆាយនៃក្រុងព្រះសីហនុ ជាពិសេសគឺសម្រស់នៃឆ្នេរសមុទ្រដែលប្រកបដោយទឹកថ្លាឈ្វេង និងឆ្នេរខ្សាច់សក្បុស ដែលជាទីទាក់ទាញនៃភ្ញៀវទេសចរណ៍ជាតិ និងអន្តរជាតិនោះ ក៏នៅមានកន្លែងមួយចំនួនមិនជាទីគយគន់ទាល់តែសោះ ហើយថែមទាំងជាទីដ៏គួរឲ្យអាម៉ាស់ទៀតផង។
ទំព័រនេះ ខ្ញុំសុំលើកយកតែជ្រុងមួយមកនិយាយតែប៉ុណ្ណោះ គឺបញ្ហាសម្រាម។ ដូចឃើញក្នុងរូបភាពនេះស្រាប់ វាជាគំនរសម្រាមដ៏ស្អុយរលួយ ត្រូវបានចាក់គរទុកចោលដែលគ្មានអ្នកទទួលខុសត្រូវសោះតែម្តង។ សឹងតែមិនបាច់និយាយក៏គេអាចដឹងបានថាគ្មានកន្លែងណាក្រៅពីកន្លែងចំណតរថយន្តក្រុងដែរ។
ភ្ញៀវទេសចរណ៍ពីក្រុងភ្នំពេញទៅក្រុងព្រះសីហនុ ឬពីក្រុងព្រះសីហនុទៅភ្នំពេញដែលធ្វើដំណើរតាមរថយន្តក្រុង អ្នកណាក៏អាចមើលឃើញដែរ។ វាគួរឲ្យអាម៉ាស់ណាស់សម្រាប់យើងជាខ្មែរដែលមិនរវល់ ឬឈឺក្បាលនឹងបញ្ហាដូច្នេះ។ វាគួរណាស់តែអ្នកទទួលខុសត្រូវចំណតនេះ ឬអាជ្ញាធរមានសមត្ថកិច្ចចាត់វិធានការសម្អាតកន្លែងនោះ ដើម្បីឲ្យអ្នកទេសចរណ៍ដែលចំណាយពេលវេលាទៅទស្សនាទីក្រុងមួយនេះ ពេលចុះពីលើរថយន្តទៅ បានស្រឡះមុខស្រឡះមាត់ផង។ មិនមែនពេលដែលចេញពីរថយន្តទៅ ពួកគេត្រូវបានស្វាគមន៍ដំបូងដោយសត្វរុយនោះទេ!!!
ដោយបំណងស្ថាបនាពី Cool Love…
UNESCO បានដាក់បញ្ចូលទីកន្លែងថ្មីចំនួន២៧ក្នុងបញ្ជីបេតិកភណ្ឌពិភពលោក
July 9, 2008 by coolloveទីក្រុងកេបិច ប្រទេសកាណាដា ៖ គណៈកម្មាធិកាបេតិកភណ្ឌពិភពលោកបានសម្រេចបញ្ចូលទីកន្លែងថ្មីចំនួន ២៧ ចូលទៅក្នុងបញ្ជីបេតិកភណ្ឌពិភពលោក នៅឯកិច្ចប្រជុំលើកទី ៣២ កាលពីថ្ងៃទី ២ ដល់ថ្ងៃទី ៧ ខែកក្កដា ឆ្នាំ ២០០៨ ក្នុងនោះក៏រួមបញ្ចូលនូវ បាការដ្ឋាន (សំណង់ការពារសឹកសត្រូវ) របស់បារាំង ប្រាសាទហិណ្ឌូមួយ និងជីវដែនសត្វមេអំបៅមួយកន្លែងផងដែរ។
ក្នុងជំនួបកិច្ចប្រជុំរបស់អង្គការយូណេស្កូ នាទីក្រុងដ៏ចំណាស់មួយនៃប្រទេសកាណាដាកន្លងទៅនេះ បានឲ្យដឹងថា ទីកន្លែងវប្បធម៌ចំនួន ១៩ និងទីកន្លែងធម្មជាតិចំនួន ៨ ត្រូវបានដាក់បញ្ចូលក្នុងបញ្ជី។
កិច្ចប្រជុំបានបញ្ជាក់ថា ចំនួនសរុបនៃទីកន្លែងបេតិកភណ្ឌពិភពលោក គិតមកដល់ពេលនេះមានចំនួន ៨៧៨ (ទីកន្លែងវប្បធម៌ ៦៧៩, ទីកន្លែងធម្មជាតិ ១៧៤ និងចម្រុះ ២៥) ស្ថិតនៅក្នុងចំណោមប្រទេសចំនួន ១៤៥។
នៅក្នុងរយៈពេលចុងក្រោយនេះ មានប្រទេសចំនួនបួនដែលទើបនឹងបានចូលក្នុងបញ្ចីជាលើកដំបូង រួមមាន ប្រទេស ប៉ាពួញូហ្គីនៀ (Papua New Guinea) សានម៉ារីណូ (San Marino) សូឌីអារ៉ាបៀ (Saudi Arabia) និងប្រទេសវ៉ាណួទូ (Vanuatu)។
ទីក្រុងនៃចក្រភពអូតូម៉ាន (Ottoman) សម័យបុរាណ ដែលស្ថិតនៅទីក្រុងប៊័រ៉ាត(Berat)បច្ចុប្បន្ន ភាគកណ្តាលប្រទេសអាល់បានី (Albania) ត្រូវបានបញ្ចូលទៅក្នុងបញ្ចីរួមគ្នាជាមួយមជ្ឈមណ្ឌលប្រវត្តិសាស្ត្រជីរ៉ូកាស្ត្រា (Gjirokastra) ដែលត្រូវបានបញ្ចូលកាលពីឆ្នាំ ២០០៥។
ក៏ត្រូវបានដាក់បញ្ចូលផងដែរនូវប្រសាទដែលកសាងឡើងកាលពីសតវត្ស ទី១៣ ដែលមានវិហារជាច្រើនក្នុងអាណាចក្រប៊ីហ្សានទីន (Byzantine) ហើយដែលត្រូវបានកសាងឡើងក្នុងសម័យកាលនៃការត្រួតត្រារបស់ទួគី ព្រមទាំងមានផ្ទះមួយចំនួនដែលត្រូវបានប្រើប្រាស់ដោយសហគមន៍សាសនាជាច្រើន ដូចជាខ្លះត្រូវបានប្រើប្រាស់ដោយសមាជិកស៊ូហ្វ៊ី (Sufi) ដែលជាបុព្វជិតនិកាយមូស្លីមមានជំនឿអរូប៉ី នៅក្នុងសតវត្សទី១៨។
គណៈកម្មាធិការបេតិកភណ្ឌក៏បានអនុម័តផងដែរនូវផ្លូវរថភ្លើងកាត់ ភ្នំក្នុងប្រទេសឥណ្ឌា ដែលគេហៅថា ផ្លូវរថភ្លើងកាល់កាស៊ីមឡា (Kalka Shimla Railway) មានប្រវែង ៩០គីឡូម៉ែត្រ ត្រូវបានកសាងឡើងក្នុងពាក់កណ្តាលសតវត្សទី១៩ ដើម្បីបម្រើសេវាទៅទីក្រុងស៊ីមឡា។
ទីកន្លែងថ្មីចំនួន ១០ ក្នុងទ្វីបអឺរ៉ុប បានបង្កើតឡើងនូវទំព័រអច្ឆរិយធម្មជាតិ និងស្ថាបត្យកម្មដ៏មានកិត្តិនាមសម្រាប់ឆ្នាំនេះ ដោយរាប់បញ្ចូលតាំងពីបាការដ្ឋានបារាំងដែលតំណាងឲ្យនិមិត្តរូបដ៏ល្អឥតខ្ចោះនៃការងាររបស់ Sebastien Le Prestre de Vauban ដែលជាវិស្មករយោធារបស់ស្តេចល្វីសទី១៤។
គេបាននិយាយថាគម្រោងរបស់ Vauban បានដើរតួនាទីយ៉ាងសំខាន់នៅក្នុងប្រវត្តិបាការដ្ឋានក្នុងទ្វីបអឺរ៉ុប ហើយល្បីល្បាញរហូតដល់ទ្វីបអាមេរិក រុស្សី និងអាស៊ីបូព៌ាផងដែរ។
ទីកន្លែងជាច្រើនទៀតនៅអាស៊ីក៏ត្រូវបានគេផ្តល់កិត្តិយសផងដែរ ដូចជាទីក្រុងពាណិជ្ចកម្មប្រវត្តិសាស្ត្រចំនួនពីរក្នុងប្រទេសម៉ាឡេស៊ី និងទីតាំងកសិកម្មពីមុនមួយកន្លែងក្នុងប្រទេសប៉ាពួញូហ្គ៊ីនៀ ជាដើម។
ប្រាសាទព្រះវិហាររបស់ប្រទេសកម្ពុជាដែលស្ថិតនៅលើកំពូលភ្នំព្រះវិហារ ជិតព្រំដែនសៀមក៏ត្រូវបានដាក់បញ្ចូលជាឯកឆ័ន្ទក្នុងបញ្ជីបេតិកភណ្ឌពិភពលោកដែរ បើទោះបីជាមានការជំទាស់ពីសំណាក់អ្នកនយោបាយ និងប្រជាជនជ្រុលនិយមសៀមយ៉ាងណាក៏ដោយ។
ភ្នាក់ងារអង្គការសហប្រជាជាតិក៏បានឲ្យឈ្មោះថាជាសម្បត្តិ បេតិកភណ្ឌមួយផងដែរចំពោះបឹង Caledonia របស់ប្រទេសស្កុតឡង់ ទំហំ ១៥០០០គីឡូម៉ែត្រក្រឡា ដែលជាកន្លែងថ្មប៉ប្រ៉ះទឹកធំជាងគេទីពីរលើពិភពលោក បន្ទាប់ពីថ្មប៉ប្រ៉ះទឹក Great Barrier របស់ប្រទេសអូស្ត្រាលី។ ឧទ្យានជាតិ Mount Sanqingshan របស់ប្រទេសចិន និងផ្ទះធ្វើពីដីឈ្មោះថា Fujian Tulou ក៏ត្រូវបានដាក់បញ្ចូលផងដែរ។
នៅមជ្ឈឹមបូព៌ាក៏មានទីកន្លែងបួនដែរត្រូវបានបញ្ចូល រួមមាន Scocotra Archipelago របស់ប្រទេសយីម៉េន (Yemen), Al-Hijr ដែលជាទីតាំងវត្ថុបុរាណរបស់ប្រទេសសូឌីអារ៉ាប៊ី ទីកន្លែងពិសិដ្ឋ Baha’i នាកំពង់ផែ Haifa និង Western Galilee របស់ប្រទេសអ៊ីស្រាអែល ព្រមទាំង Armenian Monastic Ensembles ក្នុងប្រទេសអ៊ីរ៉ង់។
សម្រាប់ទ្វីបអាហ្វ្រិក ព្រៃ Mijikenda Kaya ក្នុងប្រទេសកេនយ៉ា និងទេសភាពវប្បធម៌អរុណោទ័យ (Le Morne Cultural Landscape) នៃកោះ Mauritius ត្រូវបានគេចារិកក្នុងបញ្ជីបេតិកភណ្ឌផងដែរ។
ច្រាំងថ្មចោត Joggins Fossile Cliffs ដែលស្ថិតនៅលើឆ្នេរសមុទ្រអាត្លង់ទិករបស់ប្រទេសកាណាដា ត្រូវបានគេចាត់ទុកថាជាកន្លែងដែលល្បីល្បាញខ្លាំងបំផុតខាងការរក ឃើញផូស៊ីលទាក់ទងនឹងជីវិតនៅលើផែនដីកាលពី ៣៥៤លានឆ្នាំ ទៅ ២៩០លានឆ្នាំមុន ចំណែកឋបនីយភណ្ឌជីវដែនមេអំបៅស្តេច (Monarch Butterfly Biosphere Reserve) ប្រហែល ១០០គីឡូម៉ែត្រភាគខាងជើងទីក្រុងមិចស៊ីកូ ត្រូវបានគេចាត់ទុកថាជា “គុណតម្លៃសកលដ៏វិសេសវិសាល” ដែលមានមេអំបៅជិតមួយលានក្បាលពីកាណាដា និងសហរដ្ឋអាមេរិក ត្រឡប់មកទីនេះរៀងរាល់សរទរដូវ ហើយផ្តុំគ្នានៅពេញដើមឈើដែលធ្វើឲ្យដើមឈើក្លាយជាព័ណទឹកក្រូច។ កន្លែងទាំងពីរនេះ អង្គការយូនីស្កូក៏បានដាក់បញ្ចូលផងដែរ។
ខាងក្រោមនេះជាឈ្មោះទីកន្លែងដែលអង្គការយូណេស្កូ បានអនុម័តបញ្ចូលជាសម្បត្តិបេតិកភណ្ឌពិភពលោកក្នុងឆ្នាំ ២០០៨ នេះ ៖
New cultural sites inscribed during the 32nd session:
Preah Vihear Temple (Cambodia)
Fujian Tulou (China)
Stari Grad Plain (Croatia)
Historic Centre of Camagüey (Cuba)
Fortifications of Vauban (France)
Berlin Modernism Housing Estates (Germany)
Armenian Monastic Ensembles in Iran (Iran)
Baha’i Holy Places in Haifa and Western Galilee (Israel)
Mantua and Sabbioneta (Italy)
The Mijikenda Kaya Forests (Kenya)
Melaka and George Town, historic cities of the Straits of Malacca (Malaysia)
Protective town of San Miguel and the Sanctuary of Jesús de Nazareno de Atotonilco (Mexico)
Le Morne Cultural Landscape (Mauritius)
Kuk Early Agricultural Site (Papua New Guinea)
San Marino Historic Centre and Mount Titano (San Marino)
Archaeological Site of Al-Hijr (Madâin Sâlih) (Saudi Arabia)
The Wooden Churches of the Slovak part of Carpathian Mountain Area (Slovakia)
Rhaetian Railway in the Albula / Bernina Cultural Landscape (Switzerland and Italy)
Chief Roi Mata’s Domain (Vanuatu)
Natural properties inscribed on UNESCO’s World Heritage List during the 32nd session:
Joggins Fossil Cliffs (Canada)
Mount Sanqingshan National Park (China)
Lagoons of New Caledonia: Reef Diversity and Associated Ecosystems (France)
Surtsey (Iceland)
Saryarka – Steppe and Lakes of Northern Kazakhstan (Kazakhstan)
Monarch Butterfly biosphere Reserve (Mexico)
Swiss Tectonic Arena Sardona (Switzerland)
Socotra Archipelago (Yemen)
Extensions added onto properties already on the World Heritage List:
Historic centres of Berat and Gjirokastra (Albania)
Mountain Railways of India
Paleolithic Cave Art of Northern Spain
The Antonine Wall (United Kingdom)
ឯកសារយោង ៖
www.unesco.org
www.canada.com
